قصة موضي العصلا
موضي قبل حدعشر سنه تبلغ من العمر تسع سنين ..جراده عصلا منتفه من عصالاتها عيونها طالعه
من مكانها ولا ودك تضحك عاد تنتق عروقها و تبدا ترقل عظامها من زود النحف..!!
كانت عائلة موضي تقطن حول دوار ام سليم..!! ناس بسيطين على قد حالهم و جيرانهم بيت ابو سعد
الي كان ولدهم فارس احلام عصلتنا..!! كل يوم عصريه تروح موضي و تويدز على ملعب عيال
الحاره و تقزقز فيهم لين تشوف سعيدان و تأشر له يعني تراني خذت رسالتك كان بينهم رسايل كل
يوم تروح للمدرسه تحط رسالتها حدر حصى حول المدرسه وهو يحط رسالته العصر لا راح للملعب
حدر جمشه"كسرة تراب" عند بيت موضي..!!
كبرت موضي و كبر حب سعيدان معها وكانت مأمله اول ما يخلص ثنوي بيلقى له وضيفه و
يعرسون ..عصلتنا من صفقت 20 و ما عاد هي النتفه الي نعرف انتفخت مع تطور العالم نقلوا
في فله اكبر و فسقوا جابو لهم شغاله و ركبوا دش يعني صايره 24 تبن مقابلته و ما غير فرم و
موارس هاللي تمرس البطن مرس ..!!
و المطاعم في كل مكان متى ما طقت في راسها تبي تبلع زهمت على حدى هالمطاعم و وصلها ان
طلعت للسوق ما ترجع الا بأكياس اكل ،ان راحت لخوياتها كل جلستهم فرم و يختمونها بهمبرجرات
ثمن كلن يطس بيته و لازم تحلي عاد قبل النوم..!!
البنت طلعت تسنها دبة غاز ملامحها تجمعت في منطقه وحده في خشتها و الباقي كله عجين متكتل
على الاطراف..!! ملابس ما عاد صار شي يجي عليها ابد تروح محلات اقمشه و تشتري بالامتار و
تفصل سببت خساير فادحه لأهلها لين صار ابوها يقولها كلي تبن وانطقي في غرفتس وشوله
تطلعين..؟! عرس ما هقيت احد بياخذتس و طفرتينا على الفاضي يكفي خساير بنزينتس..!!
مقاضي البيت صايره على دفعتين شي لها و شي للعائله و اذا خلصت من طحن الي عندها ديورت
على حق اهلها و اخوانها صاروا هياكل و كل ما يشوفونها يغنون لها ((الدبا طاحت في البير
صاحبها واحد خنيزير" حاقدين على سعيدان" )) <<يذبون على جهتين
و يالشحمه يالبرميله وهي ولا همها ولا حرك فيها شي الظاهر احساسها ضاع بين هالشحوم..!!
تشلخت جدران غرفتها و اضطروا ينزلونها تنام في المقلط و السرير تعفطت حدايده و تنازل عنها و
ما عاد صار يكفيها و صار من نصيب شغالتهم "حياة" ..!!
حتى بيبان بيتهم صاروا يزيتونها عشان تمر بسهوله و لا تنشب..!!
المهم في يوم من الايام كان عرس وحده من بنات الحاره و موضي بحلت بعمرها لازم تحظر عرس
"قموش" خويتها ..اللبس و جاهز بس شعرها وش تسوي به ؟! شعرها من سمنت و هو صاير
حبتين "والله ضاع من كبر هالراس" مكياج وش تحط وش تخلي يالله بويات تكفيها ..!!
لطست عمرها و لبست كفر يقالي سواره اسم انها حاطه شي و طلعت بتركب السياره يالله تزحقل
شحمها و دبجت بعمرها في صندوق ونيت اخوها الدحمي ..!!
و يقزها سعيدان و يشوف السياره مايله على ورا و ينهبل هذي الي اباخذها ..؟!
ابفطس قبل يومي كاني خذتها..!!
و من بعدها و هو ساحب عليها و الرسايل بينهم منقطعه حتى ما عاد صار يشيك على حصاته " اقصد
الحصى حقت الرسايل" و موضي تروح تطلطل كل يوم ولا تلقى شي منه راحت تشوف رسايلها
عششت في مكانها ولا جا سعيدان خذها لين جا يوم و سمعت انه ناوي يدرس يسافر له سنه لغه
و ام سعيدان تدور حرمتن لولدها ..!!
و تفكها البنت مناحه و صياح في غرفتها و حاطه حرتها في الاكل تفرغ فيه و تنشحن زياده و تعصب
و يهتز البيت كله ..!! اهلها متعودين على الوضع اخوانها يفلونها و يلقبونها ملاهي و امها تذكر
الله لين يهدي الجو شوي <<عواصف موب صياح..!!
لين جا يوم و مسكت مزنه و حجرت لها في زاويه .. اللحين ورا اخوتس سحب علي كان يبيني وراه هون..؟!
مزنه:يا بنت الحلال من زينه بعدين ترى العرس قسمه ونصيب
موضي:يلعب بمشاعري قسمه ونصيب صدق راحوا الرجال..!!!
مزنه ضاق صدرها على حالة موضي و في نفس الوقت انقهرت من كلمتها يعني اخوي موب رجال..!!
مزنه : اسمعي عاد تبين الصدز و اقولها لتس على بلاطه..!!
انتي سمنتي و طلعتي برميله يا شيخه ما عاد تنفعين شوفي وانتي بعيده وش مسويه انواع الهزات
بعدين شلون بتحملين بكره اتركي الحمل شلون بيطلع ولدتس بيبلغ وهو ما بعد طلع ضايع في هالشحوم
و لا اذا جيتي تنامين بتقبرين اخوي لا معليش صدق انتس صديقتي و احبتس بس هذي ارواح موب لعبه..!!
وتنصدم موضي من حتسيها و تمسك شحومها و تركض من الدرج و ترقى لغرفتها و تسكر على نفسها
توها تحس بعمرها وانها لازم تنحف و تجلس تفكر وش تسوي عشان يرجع سعيدان يحبها
زي اول..؟! وش بيوخر كل هالشحم..؟؟
و فكرت خلاص انها تسوي رجيم و تصمل عليه و تطلع تتقضى لها اكل كله قليل الدسم و تحط لها
جدول بس ماااش ما قوت تمسك عمرها..مره رايحين عزيمه ومن تشم ريحة الاكل وهي تحقرص
في مكانها اول ما قالت راعية العزيمه تفضلوا على العشاء و تنطلق ما صدقت خبر ...!
قالت لها وحده وراتس كذا وين الي تقول مسويه رجيم ومنيب اتعشى الا على تفاحه و مويه ..!!
موضي: يختي وش اسوي اذا شميت الاكل ما عاد امسك نفسي غصب عني
الحرمه:يختي روحي عطار في وشيقر كلن منهبل عليه عنده علاج لكلش انتي بس قولي ابي حبوب
تسد الشهيه و بيعطيتس و ترتاحين ..!!
والله و تخش الفكره مزاج موضي ومن بكره على وشيقر يوم دخلت السوق الا و تشوف كومة
حريم عند العطار و زحمه وكلن وحده معها رقم تحتري دورها..!!
يا ساتر وش ذا الزحمه معقوله كلهم يبون ينحفون ؟؟؟
و تسمعها وحده قالت لا وش نحفه يا وخيتي انا فيني حبوب و جايه اخذ لي كريم طبيعي يسويه
هالاجودي ابد الطسه على الحبه وكلها كم يوم و تختفي..!!!
شوي الا و ينادي رقم الحرمه و تروح و موضي طايره بوهتها مع هالزحمه و تسمع العطار يكلم و
صوته يقول ايه نعم اذكره زين وش فيه ؟؟ الحمدلله اجل تعاف من السرطان تماما يعني العلاج اللي
عطيته جاب نتيجه ثم يدق ثانيه نعم ايه اعرفتس انتي اللي جيتيني قبل شهرين ايه بشري عسى
العلاج جاب نتيجه ..؟؟ ايه اجل تقولين حملتي واللي في بطنتس توم ..؟؟
الحمدلله ذلك من فضل الله سبحانهو وتعالى ومانحن الا سبب للشفاء <<<الله من التسذب ..!!!
و يالله بعدها تسمع الحريم الي تبي شي يبيض و اللي تبي تتشبب وترجع بنت وكلن يطلع
بلاويه اذا سمع فقشات هالعطار..!!
شوي و يجي دور موضي و تدخل ..
موضي: والله ياخوي ابي شي ينحفني و مدحوا لي هالحبوب الي تسد الشهيه..
و يطلع لها غرشه و يخلط لها من الخنبقه الي عنده و هات من هالرخيض تدرين قبلتس جتني وحده
دبلتس مرتين و الحمدالله عطيتها من هالغرشه و اللحين تشوفينها ولا بنت عجرم..!!
موضي: لالا انا ييزيني مثل الهام فضاله ولا ليلى علوي مهوب لازم نانسي
ويجي العطار يلعب عليها ويعطيها غرشت"ن" ثانيه ..! شوي و تلمح عرشه عجبها شكلها و تاخذها
وتقوله وشي له ؟؟ يرد عليها هذي ماتصلح لتس هذي للمتزوجه ترد طيب يعني وراه ماتصلح لي؟؟
يقول هذي تخليتس تجسرين ثم يبحلون بتس اهلتس وين يجيبون ثورن لتس ..!!
المهم خليتس على غرشتس الي عطيتس ولا تكثرين منها بعدين ترى ذي اعشاب طبيعيه ازين لتس من الحبوب كيماويات..!!
و تصدق هالمخفه و تضف الخلطه و صارت كل يوم ملعقتين وحده اول ماتقوم والثانيه اذا جت تنام ..
وما مر كم يوم الا وجها قاب نفر و حبوب و انواع التطريش ..!!
انبهلوا اهلها و ضفوها للمستشفى و يكشف عليها الدكتور و يقول ترى بنتكم تسممت وش ذا
الخرابيط الي تاكلها طلع في التحليل انها حبوب تمنع الشهيه بس مخزنه تخزين سيء و اثر
على كليتها ومعدتها قلبت ..!!
موضي:والله يا دكتور رحت لعطار و عطاني خلطه قالي انها تسد الشهيه و صرت اكلها ابي تنسد
نفسي ولا عاد اكل ..!!
الدختور:وش ذا الهبال صاحيه انتي ؟؟ نصابين ذولي ما عندهم سالفه يجمع لتس من البهارات الي
عنده و يقولتس تسد النفس!! ايه والله ان حالتس يسد النفس ..!! فيه اكثر من طريقه عشان تنحفين و
مدامتس تقولين انتس ما تتحملين ينفع لتس الربط نربط معدتس و اذا امتلت عاد غصب تشبعين ما
عاد يبقى لتس محل يروح له الاكل وش رايتس ..؟!
موضي: الي تشوفه يالله ربط ربط !!
و الله و يجي هالدكتور و بيسوي العمليه و يسدحونها ما عرف مع وين يبدا و كل شوي ياخذ له سبيع
حول السرير يبي بس نقطة بدايه ما عرف..!! قفلت معه و يلطخها و تجلس ساعه ترج
الدكتور: قومي بس قومي و فقي اثمتس ابدخل يدي و اربط معدتس مباشره اسهل اقل شي فيه طريق موب كذا متاهات..!!
و تفق اثمها و يدخل يده وتوه يوصل لذاك الشي المتدودل في فمها و يتحمس و يدخل زياده لين دخل
الرجال بكبره و صار كل ما دخل شوي يرفع الشحم الي فوقه و يزحف لين وصل منطقه تسنها برتسه
و يشوف عالم تسبح و مكيفين صح و يجي يمسك بداية هالبرتسه و يمعطها و يحاول يربط
فيها لين ضبط الوضع يوم خلص شغله و يروح ينغز اسفل المعده و تفعصه و تطرشه عشان يطلع ..!
رجعت موضي بيتهم و و قررت تسجل في نادي تمشي عشان يساعدها على الحرق وكل ما دخلت
نادي استغلوها و يضربونها في السعر و تهون ما لها الا طريق المدينه تمتره اصرف وكل ما
راحت تمشي يمرون من عندها الحريم و البزارين و يذبون عليها
قفلت مع موضي و قالت خلاص ما عاد ابي امشي ابنطق على الربط وبس ..!!
المهم جلست سبوع و تسنها نحفت شوي بس الاسبوع الي بعده بدت تحس انها رجعت لشغلها اول
و اكلها زاد يوم راحت تكشف صارت الربطات بدت تتفكك <<< مسوي عشرطعشر ربطه موب وحده !!
و ترجع لحالتها اول .. ابو موضي رحمها قال امشي بس بنسافر بتس كود نلقى لتس شي عند الافرنج !!
و تولم عفشها و يروحون للمطار و عيو يركبونها الطياره يقولهم الي عند باب الطياره الشحن موب
هنا يالاخو في الجهه الثانيه ممنوع تركب شنط كبيره معك في الطياره
و تنهبل زود ما بقى الا هو يذب عليها !!
وتاخذ عفشها يقالي زعلت و تبي ترجع و يسحبها ابوها يقولها روحي في الشحن الله يصلحتس كلها
و يركبونها في الشحن هالمسيكينه لين وصلوا لمطار وكلن واقف ينتظر شنطته تجي عند السير حق
شنط الشحن الي يدور يوم نزلت موضي فيه الا و يوقف و يتعطل عرف ابو موضي ان بنته وصلت
و يروح يجرجرها و يطسون للمستشفى الي فيذاك يوم شافها الدكتور قالها انتي ازين شي لتس
البالون بنزرعه همن تبلعينه و بياخذ مساحه في البرتسه الي يسمونها معده عندتس احسن من
الربط..!!
طلع الدكتور و قال للشله الي معه يحجزون لهم بالون بيسوون لها العمليه الليله ..موضي ارتاحت
حست ان العمليه بتنجح و بدت تتخيل عمرها وهي رشيقه و تطامر مثل اول ..!!
جا موعد العمليه وكل ما عطوها بلونه قالوا ابلعيها تطلع من الجهه الثانيه عجزوا يلقون لها بلونه
تغرز في معدتها لين قفلت معه الدكتور و سحب الخلاقين الي تحت السرير وحطهن في فراش ثاني و
ربطه كنه عفش تكرونيه و قال ابلعيه و عساه يسد ..!!
و اشوى نفع معها قالها الدكتور انطقي فيذا لا ترجعين ديرتس لين تنزلين 90 كيلو اقل شي كانتس
خففتي يعني بديتي تتماشين مع البالون الي نطلناه في البرتسه ولا جربنا شي"ن" ثاني و ترى لازم
تمشين عشان تشدين ما يصير جلدتس مترهل اختاري لتس ساعه في اليوم و متري في هالشوارع
..!!!
وابد جلست سبوعين على هالبالون و تمشي في الشارع و يشوفونها واحد و حرمته و يشجعونها
((خشه تناظر ربعنا بنص عين)) المهم في هالاسبوعين ما نزلت كثير و بدا يزويها بطنها جاها
مساك من هالخلاقين الي بالعتها كلها كم ساعه و يطلع ذا البالون و ترجع للدكتور مره ثانيه و تحوم
تسبده يوم شافها قالها شوفي فيه طريقه ومضمونه 100% بس يبي لها تنقين عندتس استعداد
من بكره نبدا نسمكرتس..!!
موضي: لو انها بوشو بس دبرني انت وفكني من ذا الشحم الي مثقلن علي !!
و يقررون لها العمليه بـ300 الف ريال حرق اول شي في ذا الشحم ثمن نحت عشان تطلع الملامح
ثمن شد و ينجطل ابوها ويييين 300 الف ابوووو خيييركم و لا قيمة سياره !!!
و تنشب موضي صياح يووووووبااااا تكفىىىىىىى اردها لك بعدين و يبدا يهتز المستشفى و
يهديها الدكتور خللاااص يا بنت الحلال بنعتبره مشروع خيري بس انثبري فيذا ناس شوي بيموتون موب ناقصين هزاتتس!!
و تسكت هالبرميله و تنبسط خلاص قرب الفرج و بترجع لديرتها و بتاخذ حمار احلامها سعيدان خلاص !!
و يبدون يسوون لها التحاليل عشان يشوفون وش نوع السكين الي بيقطعون فيها
يوم خلصت كل شي و يجلسون سبوع عشان يخدرونها و يعلقونها تسنها ذبيحه و يبدون يمعطون في
هالشحم و يقطعون و ينطلون في الغضاره بيقلبونه زيت طبيعي<<اجانب ما يوفرون
قعدوا يقطعون فيها حول خمس ايام لين بدوا يسمعون صوت طقطقه يعني وصلوا للعظام
و بدو يخفون تقطيع شوي ..!! خلصوا شغلهم و بدوا في التجميل و التخييط يبون يطلعون لها ملامح
ضاعت ثلاث ارباع ملامحها من السحب و التقطيع يوم شاف جسمها زان بس ماش مترهل قال خلنا
نسوي لها شد و يبدا يسحب في هالجلد و يدبس و يخيط لين وصل سرها لرقبتها..!!!
و الحمدالله تكللت العمليه بالنجاح و رجعت ديرتها وخقوا معها العالم معقوله ذي موضي البرميله !!
و تجي ام سعيدان و تخطبها و تمر الايام و يجي يوم عرسهم و موضي شوي و تفطس من الفرحه
بس خرب عليها شي بعد كمن يوم ما قدرت تحمل عقب الشد ما عاد ينعرف دربها..!!
ساعه يقلب يمين يسااار ماااش!! و سألته موضي وش فيك تدزلب ساعه؟؟
سعد: وش اسوي ما لقيت رقم الشاص..!!
و تشهق موضي وجعه يا شين العجله شينااااه كتالوج مكان القطع نسيناه في المستشفى!!
والله والي يتوهق سعيدان فيها قال بخليتس في ذمتي الى ان نلقى طريق و لا خذت لي ثانيه تعيل لي !!
ما يستفاد:
*لا تجرب طريقه تنحف فيها الا بعد ما تشاور طبيب وابعدوا عن الحبوب و خنبقة العطارين
*انتبهوا لأعماركم من هالمطاعم قسمن دمرت صحتنا صايرين بزرانا كور متفخه جيل دجاج و همبرجات<< وش عندها العجوز!!
** واذا شفتو مبتلي يمشي في الشارع ابتسمو في وجهه وشجعوه واحمدو ربكم عالنعمه
خلوكم ذربين شوي صدق شعب منتهي <<< طلعت منها
*اشكر كل الي تحلموا مصالتي و وصلوا اخر الموضوع
ترااااااه منقول ولا انا ماعندي إلا الدجه !!
~*¤ô§ô¤*~قسم القصص الطويلة والقصيرة~*¤ô§ô¤*~
موضوع: قصة موضي العصلا 
9/1/2008, 6:54 pm
